ROXAS CITY – Ginsiling sang Teodoro Arcenas Trade Center (TATC) Administrator nga wala sang ginbuy-an nga commitment si Roxas City Mayor Ronnie Dadivas, sa mga mapahalin nga street vendors sa Burgos Talipapa, sini nga syudad, nga tubtob nalang sa Hunyo, sini nga tuig.
Sa interview sang Bombo Radyo kay Mrs. Heloise Mendoza, ginpahayag sini nga ang nagtuga sang probema sa mga vendors sa Burgos amu ang bangud pagabawion na sang pribado nga nagapanag-iya sang duta ang ginapuwestuhan sang mga street vendors, rason nga madulaan ang mga ini sang puwesto.
Apang, sa karon nga nagapadayon ang konstruksyon sang redevelopment program sang TATC, posible suno diri nga sa ulihi magalapad ang espasyo sa merkado kag may posibilidad nga may maplastaran ang mga street vendors.
Sa pihak nga bahin sa estado sang mga nagabaligya sang meat and pork products sa guwa sang merkado, ginkumpirmar ni Mendoza nga napabalik na ang mga ini sa pagbaligya sa sulod sa fish section, matapos ang 27 ka adlaw nga ginpauntat ang mga ini, bangud sa petisyon sang chicken and pork products association sang TATC nga apektado sila sa negosyo sang mga ambulant vendors.
