ROXAS CITY – Mangin ang alkalde sang banwa sang Panay nga kaalyado ni Governor Antonio del Rosario sa partido liberal ang indi man makapati sa nangin kalutusan sang gobernador kay Governor-elect Esteban Nonoy Contreras sa amo nga banwa.
Suno kay Mayor Felipe Barredo, nakibot siya sa daku nga abanse ni Contreras batuk kay Del Rosario sa iya nasakupan nga banwa.
Apang ginpahayag sini nga sadto pa man nakahinala na sini si Capiz 1st District Congressman Emmanuel Tawi Billones Sr. kag iya ginpalab-ot ang mga ginahimo nga tikang sang kampo ni Contreras sa amo nga banwa agud makuha ang boto sang mga pumuluyo.
Angut naman sa nagalapta nga sample ballot sa banwa sang Panay kun sa diin makit-an nga gintapalan ang pangalan ni Del Rosario sang pangalan ni Contreras, nagapati si Barredo nga hungod ini nga gin-obra agud samaron ang ila nga pangalan sa partido.
Isa ini ka pamaagi suno kay Barredo agud pagwaon nga nagpangtraydor sila sa ila partido.
Sa ulihi ginpanindugan ni Barredo wala siya nagpangtraydor sa grupo kag si Del Rosario ang iya gintib-ong sa pagkagobernador.
