Mayor Leodegario Labao Jr., sang Mambusao kag Mayor Receliste Escolin sang President Roxas may term sharing sa pagdumala sa LMP-Capiz chapter

ROXAS CITY – Ginkumpirma sang alkalde sang banwa sang President Roxas nga may yara sang term sharing sa tunga nila nga duha ni Mayor Leodegario ‘’Jun’’ Labao Jr., sang Mambusao nga amo ang napilian bilang presidente sang League of Municipalities – Capiz chapter.

Ini ang  nangin paathag ni Mayor Receliste ‘’Tanoy’’ Escolin, matapos nga madamo ang nakibot sang wala na ini nagpadalagan bilang presidente sang LMP-Capiz chapter.

Suno kay Escolin nagpatigayon sila sang sinapol ni Labao kaupod sanday Governor Esteban Evan ‘’Nonoy’’ Contreras, Capiz 1^st district Congressman Emmanuel ‘’Tawi’’ Billones Sr. kag 2^nd district Congressman Fredinil Castro kag nakasugtan ang term sharing sa ila nga duha.

Ginpahayag sang alkalde nga nagpasugot ini bangud nagpasalig si Labao nga indi man ini magdugay sa pwesto.

Apang ginpasiguro ni Escolin nga tumanon sini ang iya ginpromesa sa mga alkalde nga magabulig sa paghatag sang kasadyahan sa ila kapistahan pinaagi sa pagdala sang mga artista.