ROXAS CITY– Gin-athag sang alkalde sang banwa sang President Roxas nga wala nagapuyo sa nasambit nga banwa ang senior citizen nga nagpositibo sa COVID-19.
Sa interview sang Bombo Radyo kay Mayor Receliste Escolin ginpahayag sini nga tumandok sang Barangay Aranguel ang amo nga senior citizen apang residente na subong sa isa ka subdivision sa Barangay Baybay sining siyudad.
Suno kay Escolin nga sadtong Agosto 28, naglain ang pamatyag sang nasambit nga senior citizen rason nga gindala ini sa mga klinika sa siyudad.
Apang, ginapahayag nga punuan kag wala na sang bakante ang mga klinika rason nga ginpakamaayo na lamang nga dal-on ini sa Rural Health Unit sa nasambit nga banwa.
Mahibaluan nga ginpaidalom ini sa swab test matapos nga na-diagnosed nga may yara sang Pneumonia.
Gin-athag ni Escolin nga wala ini nakapauli sa Barangay Aranguel bangud gindala ini sa RHU agud matsekyar ang iya kondisyon.
Sa karon, ginmanduan sini ang COVID task force sang siyudad nga magpatigayon sang hugot nga contact tracing.
Mahibaluan nga ginpaidalom naman sa quarantine ang 4 ka mga katapo sang RHU nga naka-close contact sa nagpositibo nga indibidwal.
