PRESIDENT ROXAS, CAPIZ – Nagalaum si President Roxas Mayor Receliste Escolin nga mangin positibo ang resulta sang gin-file sini nga certiorari sa Supreme Court.
Sa interview sang Bombo Radyo kay Mayor Escolin, iya ginpahayag nga makuha sini ang desisyon gikan sa Supreme Court sa matapos ang 30 ka adlaw bangud mas gina-una ang mga kaso nga may involved nga matag-as nga mga opisyal.
Suno kay Escolin, nagpasa man sang nagkalain-lain nga mga intervention ang pihak nga kampo rason nga mas makapadugay pa sa proseso sang pagpagwa sang desisyon.
Pahayag pa niya, apisar may mga intervention sa kaso, wala mabandog ang posisyon sini kag sa gihapon gina-ubra ang obligasyon sini bilang alkalde sang banwa.
Nagpasalig man ang natungdan sa mga pumuluyo sang President Roxas nga magagwa ang husto nga desisyon kag lauman ang padayon nga pagserbisyo para sa kaayuhan sang tanan nga wala sang pinilian.
