ROXAS CITY – May yara na sang mga plano kag programa ang bag-o nga alkalde sang siyudad sang Roxas nga makahatag sang progreso sa kabuhi sang mga pumuluyo sa siyudad.
Ginpresentar ini nga mga program ni Mayor Ronnie Dadivas sa ginpatigayon nga Executive Development Agenda meeting kaupod ang mga department heads
Suno kay Dadivas nga may acronym ini nga CHANCES nga makabulig sa tawo kag magahatag sang kaayuhan sa siyudad.
Nahibaluan nga ang C- amo ang Clean-Up and Beautification sa diin pagatutukan sini ang pagpaninlo kag pagpatahum sa palibot sang siyudad, pag-implementar sang Solid Waste Management program kag paghatag sang nagakaigo nga penalidad sa sin-o man nga mga residente nga madakpan nga nagahaboy sang basura sa palibot.
Ang H-amo ang Health and Wellness nga magahatag sang pagtamud sa ikaayong lawas sang tawo.
Ang A- naman amo ang Agriculture and Aquaculture sa diin magasuporta sa mga kinahanglanon pag-abot sa sektor sang agrikultura sang mga mangunguma kag mangingisda.
Ang N- amo ang Negosyo kag Trabaho sa diin may plano nga pagpatindog sang Industrial Park para sa mga investors kag negosyante nga nagatuyo nga magpahamtang sang negosyo sa siyudad. Subongman, sa idalom sang Public Employment Service Office magabulig sa mga pumuluyo agud indi na mabuldayan magpangita sang maayo nga trabaho.
Ang C- amo ang Community and Infrastructure Development nga magabulig kag magasuporta sa mga barangay officials sa pagpahamtang sang madamo nga road networks, road widening kalakip na ang mga streetlights kag pagpakaayo sa mga guba nga karsada sa syudad nga nagahatag sang huol sa mga motorista.
Ang E- amo ang Education and Environment para sa pagtuon sang mga estudyante kag mga manunudlo, paghatag sang scholarship sa mga estudyante.
Samtang, ang S- amo ang Social Services sa diin tuyo ni Mayor Dadivas nga mahatagan sang pagtamud ang palibot sang siyudad kalakip na diri ang pag-pauswag kag pagpatahum sang public plaza, people’s park kag madamo nga iban pa nga mahimo mangin bugal sang siyudad sa mga nagabisita nga mga turista.
