ROXAS CITY – Desidido nga magpasaka sang nagakaigo nga panumbungon si Roxas City Mayor Ronnie Dadivas batuk kay Provincial Administrator Edwin Chinel Monares bangud sa mga ginpangbuy-an sini nga tinaga sa iya Facebook account nga suno sa alkalde ‘pagpatalang’ iresponsable’ ‘malisyoso’ kag wala sang basehan nga aksusayon sa alkalde kag sa iya administrasyon.
Sa ginpatawag nga press conference ni Mayor Dadivas, ginpaathag niya ang mga pagpatalang ni PA Monares angut sa ginpadala nga Audit Observation Memorandum (AOM) sang Commission on Audit (COA) sa P1.336 bilyon nga Property, Plant, and Equipment (PPE) account balance sang City Government.
Pagpaathag ni Dadivas nga ang P1.336 billion nga ginatumod sa AOM amu ang natipon nga Property, Plant and Equipment (PPE) account balance nga may kantidad nga ₱1,336,054,216.57 ang halin pa sa mga nagligad nga administrasyon, sumugod sang tuig 2010, kag indi pa alkalde si Dadivas, apang sa karon nga administrasyon, natigayon na ini nga matadlong.
Base sa facebook post ni Monares, ginpahayag sang mga katapo sang lokal nga gobyerno sang syudad nga kaangay sa luyag patalangon ni Monares ang tawo sa tinaga nga “PPE”.
Nahibaluan nga ang ‘PPE’ nga ginatumod sa Audit report ang ginalakipan sang makinarya, edipisyo, mga gamit sa ila talatapan kag mga salakyan sang lokal nga gobyerno nga kinahanglan i-imbentaryo.
Kuntani, suno pa sa alkalde nga bilang administrador sang probinsya si Monares, ginberipika sini sa ahensya antes magpaguwa sang impormasyon nga indi makapangguba sa administrasyon ni Dadivas.
