PONTEVEDRA, CAPIZ- Dismayado si Sangguniang Bayan Member Joshua Dumapig matapos nga ginapahayag nga wala mapirmahan ni Mayor Henry Tumlos ang proposal letter para sa isa ka libre nga medical mission nga ginplano sang isa ka religious group halin sa Estados Unidos.
Ang nasambit nga aktibidad, plano kuntani nga patigayunon sa Barangay Rizal kag sa tatlo pa ka mga kabarangayan sa banwa sang Pontevedra sa bulan sang Pebrero 2026. Apang bangud wala ini naaprubahan sang alkalde, indi na madayon ang ginapaabot nga proyekto nga kuntani makabulig sa madamo nga pumuluyo.
Suno kay Dumapig, daku nga kasubo ang pagkanselar sang amo nga programa ilabi na nga ini ang oportunidad nga makabaton sang libre nga serbisyo medikal ang mga pigado kag wala sang kapasidad magbayad sang bulong, laboratory tests, kag check-up. Ginpahayag man niya nga madamo nga pamilya ang nadula-an sang paglaum sa natabo.
Nahibaluan nga target kuntani nga makabenepisyo ang 6,000 ka mga indibidwal halin sa nagkalain-lain nga barangay, pinaagi sa presensya sang mga bisita nga doktor kag health volunteers halin sa abroad.
Samtang, wala pa nagpagwa sang pahayag si Mayor Tumlos angut sa isyu kag ginahulat ang dugang nga klaripikasyon sa iya nga desisyon.
In an interview with Bombo Jessa Mae Siman De Los Santos
