Dakop sa akto sang mga katapo sang Maayon MPS, ang paglumpat sang isa ka menor de edad sa pader sang isa ka eskwelahan sa Barangay Indayagan, banwa sang Maayon.
Ginkilala ang arestado kay alyas “Makoy”, 17-anyos, kag residente man sang nasambit nga banwa.
Sa interview sang Bombo Radyo kay PMAJ. Syril Punzalan, hepe sang Maayon MPS, ginpahayag nga samtang nagapatigayon sang pagpatrolya ang kapulisan hinali nila nga nakit-an ang suspek nga naglumpat sa pader sang nasambit nga buluthuan.
Pahayag pa ni Punzalan nga dakop sa akto sang mga kapulisan si alyas Makoy nga may dala nga armas luthang.
Narekober sa paghinakop sang arestado ang isa ka unit sang homemade break type .38 caliber pistol, 2 ka mga bala, 2 ka screw driver kag isa ka sling bag.
Sa karon, yara na sa paghinakop sang Womens and Children Protection Desk sang Maayon Municipal Police Station ang nasambit nga menor de edad para sa nagakaigo nga disposisyon.
