ROXAS CITY – Nagapabilin nga unidentified ang suspek sa pagpangbuno sa isa ka menor de edad nga nagasakay sa motorsiklo sa Sitio Agpipili, Barangay San Nicolas, Tapaz, Capiz.
Ang wala na ginhingadlan nga biktima ang nagapang-edaron sang 17-anyos kag residente sang nasambit nga barangay.
Sandig sa impormasyon nagikan sa Tapaz MPS, naga-angkas ang biktima sa motorsiklo nga ginamaneho sang iya abyan kaupod ang isa pa nila ka abyan, kag yara ini sa katapusan nga puwesto sang motor.
Ginapahayag nga may naglabay nga motorsiklo kag hinali nga ginbuno sang isa ka angkas ang nasambit nga biktima, kag madasig nga nagpalagyo.
Dugang pa sang mga kapulisan nga patal nga pilas ang naangkon sang menor de edad bangud naga-ungot pa ang kutsilyo sa likod sini.
Ginpadangat ini sa Tapaz District Hospital apang gin-transfer sa Western Visayas Medical Center para sa dugang nga pagbulong.
Ginahibalo pa sang mga kapulisan ang madalom nga motibo sang suspek sa nasambit nga insidente.
