ROXAS CITY – Magapaidalom sa personal safety training ang tanan nga mga abogado sa hanay sang Integrated Bar of the Philippines (IBP) Capiz chapter.
Ito ang kasunod sang natabo nga pag-ambush kay Atty. Cris Heredia kaupod ang anak nga doktor kag kliyente sini sa Barangay Malapad Cogon, Sigma, Capiz kahapon.
Suno kay Atty. Remia Fuentes-Bartolome, IBP-Capiz chapter President, ang pagpaulan sang bala sa salakyan ni Heredia ang nagtuga sang kahadlok sa iban pa nga mga abugado.
Gindugang pa sini nga magapangayo sila sang bulig sa pamunuan sang Capiz Police Provincial Office sa pagahimuon nga personal safety training sa mga abugado.
Katuyuan sini nga mapreparar ang mga abugado sa posibilidad nga matabo man sa ila ang nasambit nga insidente.
Gindugang pa sini nga magaserbi man nga leksiyon ang natabo sa tanan nga mga abugado.
Sa ulihi liwat ini nagpanawagan nga untatan na ang wala patyanay sa pungsod.
