Nagpanawagan ang Mayors for Good Governance kay Presidente Ferdinand Marcos Jr. nga hingadlan ang mga kurakot nga pulitiko kag kontraktor sa likod sang palpak nga mga proyekto sa imprastraktura, ilabi na sa flood control.
Ginpahayag sang grupo — nga ginalakipan ni Mayor Benjamin Magalong (Baguio), Mayor Vico Sotto (Pasig), Mayor Joy Belmonte (Quezon City), kag Mayor Sitti Hataman (Isabela City) — nga madugay na nga may yara sang korapsyon sa sini nga proyekto kag dapat manabat ang mga involved.
Ginhingyo nila sa Department of Public Works and Highways (DPWH) kag iban pa nga ahensya nga magpaguwa sang mga dokumento kag ngalan sang mga pulitiko kag mga kontraktor nga nakabenepisyo sang masobra P100 bilyones nga pondo, nga nagkadto lamang sa 15 ka mga kontraktor humalin 2022 tubtob 2025.
Ang panawagan nag-ugat sa pagkabalaka ni Presidente Marcos sa kalidad sang mga proyekto, kaangay sang naguba nga flood barrier sa Calumpit, Bulacan, sa diin nagpabutyag ini sang pagkadismaya.
Samtang, ginpahayag ni Mayor Magalong nga willing siya nga magboluntaryo nga mangin kabahin sang independent body basta pahanugutan siya nga magpili sang mga imbestigador nga mangin kabahin sang nasambit nga board.
Naghingyo man ang alkalde nga kun kinahanglanon, tugutan siya nga personal nga magpili sang mga ahensya nga mangin kabahin sang board.
