Kinahanglan sa gihapon nga magsunod sa guidelines sang mga Agrarian Benefeciaries sa pihak nga wala na sang balayaran sa duta nga gin-award sang Department of Agrarian Reform.
Sa interview sang Bombo Radyo kay Atty. Arthur Lastimoso Legal Officer sang Department of Agrarian Reform (DAR) Capiz, ginpahayag sini nga padayon sa gihapon ang ila monitoring sa mga benepisyaryo kag sundon ang tanan nga mga obligasyon ilabi na ang 10 year holding period sa mga na award nga duta.
Suno kay Lastimoso nga ila ginapahanumdum sa mga mangunguma nga indi dapat pag-ibaliya, pag-edonate ang duta nga gin-award sa ila kung wala pa makaabot sa napulo ka tuig.
Dugang pa sini nga kung mapamatud-an nga ginahimu ini sang ARB’s mahimu nga madisqualify ang mga ini kag bawian sang duta.
Apang kinahanglan nga may ara sang pormal nga reklamo agud makapatigayon man sila sang imbestigasyon.
Pagpaintindi ni Lastimoso sa mga beneficiary nga ang katuyuan nga gin-award sa ila ang duta agud nga i-develop, i-kultibar para nga makabulig sa ila pangabuy-anan.
Samtang may ara naman sang proseso sa mga duta nga nagsobra na sa napulo ka tuig para mapa-titulohan kung ini ang luyag na ibaligya sang benepisyaryo.
