Ginakabig nga isa ka dako nga problema sang pamunuan sang Barangay Balijuagan, syudad sang Roxas ang masami nga pagkalat sang mga basura sa Sitio Pari, sa mga nagapadulong nga mga persona para magtambay.
Sa interview sang Bombo Radyo kay Punong Barangay Ronnel Fernando, kalabanan sa mga nagapadulong sa lugar, ang mga pamatan-on kag ang mga ini man ang ginatudlo nga yara sa likod sang paglapta sang mga basura sa nasambit nga lugar.
Dugang pa sini, kalabanan sa mga nagapadulong sa lugar, mga pangayaw. Suno sa iya, wala man sila nagkulang sa pag-chekyar kag paghatag sang pahanumdum sa mga nagapadulong diri nga ihaboy ang basura sa tama sini nga bulutangan.
Mahibaluan nga nagpahamtang ang mga ini sang basurahan nga pagabutangan sang basura sang mga nagapadulong sa lugar apang suno man kay Fernando, wala nagapamati ang iban nga mga kabataan kag padayon gihapon nga nagahaboy sang basura nga kalabanan pa, mga botelya nga kun sa diin ginapangpusa kag gina was-ag sa dalan.
Bangud sa nadangtan nga sitwasyon, natigayon nga ipasarado sang temporaryo ang nasambit nga lugar para ma-kontrol sang pamunuan ang sitwasyon.
Panugyan ni PB Fernando sa mga magapadulong liwat sa lugar, nga kun tani mag sunod ang mga ini sa mga patakaran kay suno sa iya, para sa publiko ina nga lugar nga kun sa diin makapaliwa-liwa ang tagsa-tagsa.
