ROXAS CITY – Ginkompirmar sang pamunuan sang Department of Environment and Natural Resources-Environmental Management Bureau (DENR-EMB) nga gilayon nga nagsunod ang pamunuan sang Roxas Memorial Provincial Hospital sa ila ginmandu nga ibutang sa container, i-seal kag butangan sang label ang mga basura sang Out Patient Department sang amo nga ospital nga una ginhaboy sa isa ka bakante nga lote sa Barangay Lanot, Roxas City.
Ini ginpahayag ni Engr. Marlon Bonite, head sang Solid Waste and Management Division sang DENR-EMB sang mainterview sang Bombo Radyo.
Ginpanindugan ni Bonite nga indi man mahimo masug-an ang nasambit nga mga basura bangud sandig sa laye, hugot nga ginadumilian ang open-burning.
Suno kay Bonite nga matapos makalab-ot sa ila ang reklamo sang mga residente sa lugar, gilayon sini nga gintawag ang atensiyon sang nasambit nga ospital.
Una naman nga nag-abiso si Bonite nga magpakig-angut sa mga accredited nga mga transporter kag treater sang mga hazardous wastes sa siyudad sang Iloilo ang amo nga ospital.
Matandaan nga ginpanindugan man ni Bonite nga may yara sang mga nakaigo nga protocol nga ginasunod sa paghaboy mga hazardous wastes kag hugot nga ginadumilian ang paghaboy sini sa mga lugar nga may yara sang mga panimalay.
Ginkompirmar man ni Bonite nga ginahulat pa sini ang mangin sabat sang pamunuan sang amo nga ospital kasunod sang ginpapanaog sini nga notice of violation.
