ROXAS CITY – Nakapauli na sa ila mga balay ang 18 ka mga biktima sang food poisoning matapos gin-obserbahan sa ospital bangud sa pagsakit sang tiyan kag pagpalanuka.
Sa interview sang Bombo Radyo Roxas kay Dr. Suzette Jinon sang Mambusao District hospital nga gindalhan sa mga biktima, ginkumpirma sini nga food poisoning ang rason sang paglain sang pamatyag sang 18 ka mga indibidwal.
Apang matapos nga madapatan sang pagbulong kag mag-ayo na ang ila pamatyag, ginpahanugutan na sila nga makapauli para makapahuway sa ila mga balay.
Sa pagpangusisa ni Dr. Jinon sa mga biktima nahibaluan sini nga tanan nga nakabatyag sang pagpalanakit kag pagpalanuka ang gikan sa fiesta kag nagkaon sang nilaga nga baboy sa balay sang ila himata.
Posible nga diri nakuha sang mga biktima ang bacteria nga ginhalinan sang paglain sang ila pamatyag.
Bangud sa insedente, ginpahanumdum ni Dr.Jinon ang publiko nga maghalong sa pagkaon, labi na karon nga summer season sa diin madali nga mapan-us ang pagkaon bangud sa tuman nga init sang panahon.
