ROXAS CITY – Liwat naman nga nagtuhaw ang mga nabiktima sang FOREX investment scam sa siyudad sang Roxas.
Anom ka mga indibidwal ang nagdangop sa Roxas City Police Station agud magpa-record nga nabiktima man sila sang nasambit nga investment scheme nga ginapamunuan sang ginbansagan FOREX investment scam queen nga si Lourdes Baarde.
Ginkilala ang mga biktima nga sanday Sonny Odicta sang banwa sang Panay; Marilene Buensalido, 64 anyos sang Bailan; Hannah Angelica Pianias, 23 anyos sang Panay; Anita Acolentaba, 56 anyos sang Panay; Hannah Caputero sang Phil. Railway Street; kag Jane Gobuyan, 35 anyos sang Barangay Banica, Roxas City.
Magluwas kay Baarde, ginareklamo man sang mga complainant sanday Joel Damayan, Ma. Victoria Rachel Chavez-Perdo, kag Rebecca Venturado.
Suno sa mga biktima, gin-isyuhan sila ni Baarde sang mga talbog nga tseke nga nagabalor tanan sang masobra isa ka milyon ka pesos.
Ang iban pa nga mga suspek ang ginapahayag upline ni Baarde nga mga traders sang nasambit nga investment scam.
Bangud diri, desidido nga magpasaka sang nagakaigo nga reklamo ang mga biktima batuk sa mga suspek.
