ROXAS CITY – Nagapabilin sa gihapon sa ospital ang mga biktima sang vehicular accident nga nagluntad sa Barangay Cagay, Roxas City.
Ang mga biktima amo si alyas Rey, 20-anyos kag residente sang Brgy. Manibad, Mambusao, Capiz, kag si alyas Icy, 19-anyos kag residente sang banwa sang Jamindan, Capiz.
Sa interview sang Bombo Radyo kay Police Lieutenant Colonel Donnel Regis, Hepe sang Roxas Component City Police Station, iya ginpahayag nga nagapabilin sa Intensive Care Unit sang Roxas Memorial Provincial Hospital si alyas Icy bangud sa mga pilas nga naangkon sini samtang si alyas Rey ang padayon man nga nagapaayo.
Suno kay Regis, self-inflicted ang nagluntad nga aksidente kun sa diin nadulaan sang kontrol sa manibela ang driver samtang ginasubay ang dalan sang Barangay Cagay, rason nga nagbunggo kag natumba ang nasambit nga motorsiklo.
Nagapanawagan man ang natungdan sa mga motorista nga maghalong ilabi na ang yara sa impluwensya sang makahulubog nga ilimnon agud malikawan ang ano man nga sahi sang insidente.
