ROXAS CITY -Ginkompirmar sang Provincial Director sang Department of the Interior and Local Government (DILG)-Capiz nga nakumpleto ang mga contact tracers nga ginhire sang ahensiya agud magserbisyo sa probinsiya batuk sa COVID-19.
Ini ang ginkompirmar ni Mr. John Ace Azarcon, Provincial Director sang DILG-Capiz sang mainterview sang Bombo Radyo.
Ginpahayag ni Azarcon nga nakumpleto na ang 330 ka mga contact tracers nga ginhire sang nasambit nga ahensiya para magbulig sa contact tracing sang probinsiya.
Suno sa opisyal nga ang mga na-hire nga mga contact tracers ang magabulig sa mga nga contact tracers nga dati na nga na-establisar sang mga LGUs humalin subong nga bulan tubtob sa bulan sang Disyembre.
Gindugang pa ni Azarcon nga magabaton sang Salary grade 9 nga suweldo ang mga ginhire nga mga contact tracers ukon P18,700 ka da bulan.
Ginkompirmar man ni Azarcon nga nagasugod na ang paghanas sa mga contact tracers kun sa diin ginpaintindi sa ila ang mga risgo nga ila posible maatubang sa tion nga magsugod na ang ila nga trabaho.
Samtang ginklaro man ni Azarcon nga may yara sang parameters nga ginasunod ang ahensiya sa kun pila ka mga contact tracers ang iga-deploy sa mga kabanwahanan.
Suno sa kay Azarcon nga nakadepende sa numero sang mga positive case sang isa ka LGU ang numero sang mga contact tracers nga igahatag sa ila sang ahensiya.
