ROXAS CITY – Liwat naman nga nagpatuman sang dako nga pagtaas sa presyo sang produktong petrolyo ang mga oil companies subong nga adlaw sang Martes, Hunyo 7.
Base sa abiso sang Pilipinas Shell Petroleum Corp., ang presyo sang kada litro sang gasolina ang nagtaas sang P2.70, diesel – P6.55, kag ang kerosene – P5.45.
Epektibo ang price increase kaina sang alas-6 sang aga.
Sa interview sang Bombo Radyo kay Jonny Villarina, isa ka Van driver nagabyahe Maayon to Roxas vice versa, ginpahayag sini nga gamay nalang ang iya ginakita sa pagpamasada bangud nagaporsyento lamang ini sang salakyan kag indi na kaigo ang iya kita sa ila pang-adlaw adlaw nga kinahanglanon sang iya pamilya.
Dugang pa sini, nga doble na ang ila pagtughong sang gasolina ikumpara sang una.
Suno naman kay Mario Farinas, isa ka trycicle driver, ginpahayag sini nga dako naman ang epekto sa ila nga mga trycicle driver ang liwat nga pagtaas sang gasolina.
Dugang pa sini, kun nagatinaas ang gasolina wala sa gihapon sila sang mahimo kundi magbyahe sa gihapon bangud wala man sila sang iban nga ubrahan magluwas sa pagbyahe sang tricycle.
Sang una, ang iya P100 duwa na ka litro ang iya mapatughong, apang subong nagdoble na ang iya ginabayran kag indi na makalab-ot sang apat ka litro.
Gintuad man sini nga tubtob sa karun wala pa sila nakabaton sang ayuda nga ginahatag sang gobyerno.
Apektado man suno diri ang ila pagbyahe bangud sa libreng sakay nga ginpatuman sang gobyerno sang syudad gani malaka nalang ang ila pasahero nga mapasakay.
Ginsiling man sini, nga kun ang ginbayad sang gobyerno sa libreng sakay kuntani ginhatag nalang sa ila nga mga tricycle driver bilang ayuda. Nagapangabay man ini sa gobyerno nga ihatag na ang ila ayuda bangud madugay na sila nagahulat.
