ROXAS CITY-Nagpanindugan ang Local Government Unit sang Panay nga madugay na nga wala gina-istaran ang mga balay sa Panay Ville nga ila gin-ekisan kag ginkandaduhan kasunod sang ila monitoring.
Sa intervîew sang Bombo Radyo kay Mr.Jessie Baes Municipal Planning Officer sang LGU Panay nga nagpatigayon sang Local Inter Agency Commitee Meeting ang munisipyo sa Pagpanguna ni Mayor Vicente Bermejo,kag yara man ang presensya sang taga National Housing Authority.
Pahayag ni Baes nga wala ginakilala sang NHA ang mga dokumento nga ginauyatan sang mga nagaistar sa pabahay nga si anay administrador Julius Villalobos ang nagpirma.
Dugang pa ni Baes nga may ara sang mga dokumento nga kinahanglan isumiter sang nagligad nga administrasyon sa NHA para macertify kag makabig nga mangin lehitimo ang pagpanag iya sang mga housing unit nga gin award sang tiempo ni anay Mayor Felipe Barredo,apang wala ini nila matigayon.
Suno ka Baes nga ang ila ginabasehan nga mga lehitimo nga tag iya sang balay ang ara sa listahan sang NHA kag nagapaathag nga wala nila ginaharass ukon ginapamulitika ang mga nagaistar nga indi legal ang pag istar sa amu nga balay.
Nahinalaan man sa amu nga sinapol nga pagahatagan sang tsansa nga mag apply sa munisipyo ang mga nagaistar sa panay ville nga may peke nga dokumento,kag kung ini ang makapasar sa ila nga evaluation mahimu man nila maistaran ang amu nga balay.
Sa karun, indi pa matumod sang munisipyo kung pila tanan ang mga yara sa listahan sang NHA nga nagaistar sa Panay Ville kay may ara nga nagbaligya sang mga unit kag nagaparenta.
