Nakatigana na ang espesyal nga lugar sa impyerno para sa mga involved sa maanomalya nga flood control projects sang gobyerno.
Ini ang hugot nga ginsiling ni Senador JV Ejercito kasunod sang pagbuyagyag ni Presidente Ferdinand Marcos Jr. sang Top 15 flood control projects contractors.
Nagapati ang senador nga may yara sang sikreto nga sabwatan sa nasambit nga proyekto kabangdanan kun ngaa wala nagakahatagan sang igtalupangod ang problema sang malapnagon nga pagbaha sa madamo nga lugar sa pungsod.
Suno kay Ejercito, indi magmando kag mamadla ang mga yara sa likod sang paliwat-liwat nga iregularidad sa flood control projects kun wala sang may mapreso kag magpanabat.
Hugot pa sini nga ginsiling nga wala sang nagakatiphag bangud wala man sang dalagkuan nga personalidad nga nagakadakpan kag ginasilutan sang layi, kundi ang magagmay nga mga tawo nga nagamit lamang.
Ginsuhestyon man ni Ejercito ang regular nga pagpahalin-halin ukon reshuffling sang mga district engineer, base sa pahayag ni Senador Panfilo Lacson nga sa district level nagaumpisa ang korapsyon.
Nagapati si Senador JV Ejercito nga dako nga bulig ang intervention sang pribado nga sektor agud maresolba ang problema sa baha.
Madumduman nga ginbuyagyag ni Senador Ping Lacson ang ginaalegar modus sang pila ka mga mamalidha nga kadungan man nga nagapakilala bilang contractor sa mga flood control project, nga nagaresulta sa overpricing kag manubo nga kalidad sang mga proyekto.
Suno sa senador, sa idalom sang “passing through” scheme, pwersado nga magabayad ang contractor sang lima tubtob anom ka porsyento sang project cost sa tion magaubra sang proyekto sa distrito nga kun sa diin contractor ang mamalidha ukon paryente nya.
Dugang pa niya, automatic nga nagakabuhinan ang pondo sang proyekto bangud diri, kag tion nga ginlakip pa ang iban pa nga mga balayaran kag komisyon, labi pa nga nagagamay ang balor nga nagakadto sa aktwal nga konstruksyon.
Sa pagtantya ni Lacson, masami yara sa kapin 40 porsyento na lang sang gintigana nga pondo para sa flood control ukon iban pa nga infrastructure project ang nagakabilin matapos ang nasambit nga modus kag mga dugang nga balayaran.
