ROXAS CITY-Nagapadayon pa sa karon ang imbestigasyon sang Ivisan Municipal Police Station sa nagluntad nga bungguanay sang ambulansya sang Sigma Disaster Risk Reduction and Management Office kag Montero Sports sa National Highway sang Barangay Ondoy, Ivisan, Capiz.
Sa interview sang Bombo Radyo Roxas kay Police Master Sergeant Jonathan Layson, imbestigador sang Ivisan MPS ginpahayag sini nga indi pa sa karon mapat-ud kung sino ang may yara sang salabton sa amo nga aksidente bangud wala sang may nakasaksi sa insedente nga ginalauman kuntani nga makabulig sa imbestigasyon.
Suno kay Layson nadugayan pa nga makuha ang mga biktima sa sulod sang ambulansiya rason nga ginguba pa ang unahan nga porsyon sang amo nga service car.
Sa dugang nga pagpangusisa ni Layson, natulugan na si John Rey Castillon, isa sa mga sakay sang nasambit nga ambulansya rason nga wala ini sang ideya kung ano ang tul-id nga natabo sang aksidente.
Samtang wala naman sang mahatag nga impormasyon ang duha ka mga indibiwal nga sakay sang Montero Sports nga ginamaneho ni Police Captain Monsera bangud ginapahayag natulugan man ang mga ini.
Samtang ginpahayag naman ni Punong Barangay Danilo Obrigue sang Barangay Ondoy, Ivisan wala sini makita ang akwtal nga natabo sa aksidente bangod ulihe na ini naka-abot sa ginluntaran sang insidente apang ginapahayag sini nga nakabulig pa ini nga madala sa ospital ang mga pilason.//
Gindugang pa ni Obrigue nga nakita na lamang sini nga nagadunglay na ang ulo sang driver sang ambulansiya samtang yara naman sa kritikal nga kahimtangan ang upod sini nga nagapungko sa unahan sang salakyan.
