ROXAS CITY, CAPIZ- Nagapanawagan sa liwat ang mga market vendors nagikan sa Burgos Talipapa nga ginhalin sa Teodoro Arcenas Trade Center sang bulig sa Roxas City Government may kaangtanan sa ila nga sitwasyon sa pagbaligya kag baklanay sang mga tawo sa amo nga merkado.
Sa interview sang Bombo Radyo sa pila ka mga vendors sa amo nga bahin, ila ginpahayag nga luyag nila kuntani mahatagan na sang nagakaigo nga igtalupangod ang madugay na nila nga ginahinyo sa City Government partikular ang pagkay-o sang ila napahamtangan sa diin nga may yara sa gihapon sang barado nga kanal, madanlog nga salog kag mga buka nga tiles.
Dugang pa nila, may posibilidad nga bangud sa amo nga kahimtangan kag sitwasyon sang ila nga pwesto, indi masami nagasulod ang mga bumalakal.
Nahibaluan nga base sa ila nga mga pahayag, madamo na sang nagkaladanlog –indi lamang ang mga nagabakal kundi pati sila mismo nga mga nagabalaligya.
Panawagan nila sa City Government nga kuntani mahatagan na ini sang aksyon bangud suno sa ila, dako ini nila nga problema sa ila nga pangabuy-anan sa diin nga sandig sa ila nga obserbasyon mas nagdamo ang ila nga mga kautangan ka gang iban napilitan nalang nga mag-untat sang ila gamay nga palangitan-an.
In an interview with Bombo Francis Biñas
