CAPIZ – Naglab-ot sa masobra 7,000 ang narekord sang Capiz Provincial Disaster Risk Reduction and Management Unit nga mga epektado nga indibidwal bangud sa bagyo Opong.
Sa interview sang Bombo Radyo kay Atty. Sheila Artillero, head sang Capiz PDRRMU, iya ginpahayag nga kabug-osan nga 7,555 ka mga indibidwal ukon katumbas sang 2,288 ka mga pamilya ang apektado sang nasambit nga bagyo.
Ang ini nga data ang sandig sa mga nabaton nga reports halin sa mga kabanwahanan kahapon nga adlaw.
Sa data sang talatapan, nagapakita nga ang President Roxas ang may pinakamadamo nga indibidwal nga naapektohan nga may 1,656; ginasundan ang Roxas City nga may 1,572 kag banwa sang Pilar nga may 1,039.
Suno kay Artillero, nagpadayon sa subong nga aga ang paglibot sang Capiz Provincial Government sa mga evacuation centers sa nagkalain-lain nga banwa agud matsekyar ang sitwasyon sang pila ka mga evacuees.
Nagapasalamat ang natungdan sa kooperasyon sang mga pumuluyo bangud wala sang may narekord nga casualty sa probinsya.
