ROXAS CITY – Gin-ubos panglubong kalakip ang mga buhi nga mga nabilin nga manok kag itik sang isa ka backyard poultry farm sa Sitio Cablatan, Barangay Cagay, Roxas City, matapos nga nagpositibo sa bird flu ang amu nga mga manok.
Ini ang ginkumpirmar ni Punong Barangay Arturo Aragon, sang mainterview sang Bombo Radyo.
Suno diri, indi pa matumod kun sa diin nagikan ang amu nga virus, apang ginadudahan nga nagikan ini sa ginabulubanta 180 ka mga gin-order sang tag-iya nga ‘layer’ nga mga manok, bangud una nga nagkalamatay diri ang masobra 50.
Matapos nga nabaton sang syudad kag sang tag-iya sang gamay nga farm ang resulta sang ginpatigayon nga test, ginpadal-an sang City government sang backhoe agud magkutkot sang buho kag didto ginpanglubong ang tanan nga mga nabilin nga manok nga layer kag native kag subong man ang mga itik, agud matapna ang paglapta sang nasambit nga virus.
Dugang pa ni Aragon nga hugot ang ila monitoring sa amu nga lugar kag wala man sang dapat nga kabalak-an bangud nagaisahanon kag kaangay talon ang amu nga poultry kag wala sang pamalay nga nakapalibot, kag may isa lamang ka caretaker.
Natigayon naman nga ma-disinfect ang amu lugar.
Nahibaluan nga sang katapusan nga semana sang Nobyembre sang nagpakig-angut ang tag-iya sang poultry farm sa ila barangay, matapos nga nagkala-aratay ang iya mga manok, sumugod diri, wala na ginpaguwa ang iya mga kasapatan sa amu nga farm tubtob nagguwa ang resulta sang test, sang Disyembre 2, 2022.
