PRESIDENT ROXAS, CAPIZ- Nagapabilin pa sa magkatuhay nga ospital ang tagsa ka mga biktima sang nagbungguanay nga mga motorsikolo sa Barangay Vizcaya, President Roxas, Capiz.
Ang mga biktima amo sanday Sandro Rico, 41 anyos, driver sang motorsiklo, upod ang duha niya ka sakay nga nagabusong kag residente sang Sitio Lonok, Brgy Vizcaya, President Roxas, Capiz, samtang ang driver naman sang isa ka motorsiklo amo si James De Mayo 16 anyos, nga may upod man nga pasahero kag residente sang Brgy. Duluan, Maayon, Capiz.
Sa interview sang Bombo Radyo kay Police Major Alfred De Leon, Hepe sang President Roxas Municipal Police Station, iya ginpahayag nga wala pa sa gihapon makarekober ang amo nga mga indibidwal pagkatapos sang natabo.
Matandaan nga nagluntad ang amo nga aksidente sang Oktubre 2, sa diin ginapahayag nga padulong kuntani sa banwa sang Pontevedra ang motorsiko nga ginasakyan ni Sandro sang hinali na lang ini nga nabunggo sa likod sang motorsiklo ni James.
Bangud sa mabaskog nga impact, nag-angkon sang pilas sa magkatuhay nga parte sang lawas ang mga biktima nga gilayon naman nga ginrespondehan sang mga katamo sang Municipal Disaster Risk Reduction and Management Office – President Roxas antes nga ginpadangat sa ospital.
Dugang pa sang natungdan, wala pa naman sang desisyon ang tagsa ka mga pamilya may kaangatanan sa amo nga hitabo apang nagapadayon ang koordinasyon sang tagsa-tagsa para sa nagakaigo nga disposisyon.
Nagpahanumdom man ini sa tagsa ka mga motorista nga maghalong gid sa tagsa ka mga tion nga nagamaneho agud nag malikawan nga maaksidente sa dalanon.
Interviewed by Bombo Jessa Mae De Los Santos
