Ginsuguran na sang Department of Education (DepEd) ang pagpaguwa sa mga nagdaan nga laptop halin sa mga bodega sini para sa padayon nga distribusyon sa nagkalain-lain nga opisina sini.
Suno kay Department of Education (DepEd) Secretary Juan Edgardo Angara, masobra 50% na ka mga laptop nga nakatambak sa mga warehouse sang ahensiya ang naipaguwa samtang ang iban ang padayon pa nga ginakay-o para sa pagdala sa nagkalain-lain nga lokasyon.
Nagpangayo na man suno diri ang DepEd sang bulig sang Philippine Air Force para maibiyahe ang mga ini padulong sa malalayo nga lugar samtang pila ka mga local government unit na man ang nagpabutyag sang bulig para sa pagbiyahe sa mga computer agud maihatag na sa mga opisina sang DepEd kag mga eskwelahan.
Una na nga ginpahayag ni Sec. Angara nga mas ukon menus 1.5 million unit sang mga laptop kag iban pa nga mga kagamitan ang nakatambak lamang sa bodega sini.
Ang mga ini ang humalin pa sang tyempo ni anay Secretary Leonor Briones sang 2020 tubtob 2021.
Suno sa tiglikom, kinahanglan nga sakuon na ang distribusyon sang mga nasambit nga laptop bangud sa may lifespan ang mga ini. Bangud sa madugay na panaho nga natambak ang mga ini sa bodega, posible nga malapawan na ang lifespan sang mga ini.
Aminado man ang tiglikom nga ang mga nasambit nga laptop ang mga ‘outdated’ na apang naghimo naman suno diri sang pamaagi ang Information and Technology team sang DepEd agud magamit pa ang mga ini.
