ROXAS CITY – Nagaapelar ang mga negosyante sa kilid sang baybayon sa Barangay Baybay, Roxas City nga kun mahimo hatagan sila sang parking space.
Ini kasunod sang ginpapanaog nga memorandum ang Department of Interior and Local Government (DILG) nga pagpatuman sang road clearing operation 2.0.
Suno kay Marites Alantaso, isa sa mga negosyante, halos wala na sang magakaon sa ila nga establisyemento kun wala sang parking area ang ila nga mga customers.
Suno pa sa iya nga base sa ila obserbasyon, nagapili ang ila nga mga customers nga may dala nga salakyan sang ila pagakan-an nga may yara sang parking space.
Ginpahayag sini nga posible maganubo ang ila nga benta kun ipatuman ang na road clearing operation sa syudad sang Roxas.
Samtang suno naman kay Bernie Albason Jr. isa sa mga negosyante, dako ang madula sa ila kun wala na sang parking area ang ila mga customers.
Aminado ini nga madugay na nga ginagamit nga parking space ang karsada sa amo nga lugar.
Sandig sa obserbasyon ni Albason nga indi naman tuman ka damo ang mga nagalabay nga salakyan kun gab-i sa amo nga lugar.
Bangud diri, plano sang pila ka mga negosyante nga mag-apelar sang bulig sa alkalde sang syudad nga mahatagan sila sang parking area sa Baybay Beach.
