ROXAS CITY – Posible mapasakaan sang kaso ang mga newly-elected local government officials sa Isla sang Panay nga nagasuporta sa rebelde nga New People’s Army (NPA).
Ini ang ginpahayag ni Lt. Col. Joel Benedict Batara, ang battalion commander sang 61st Infantry (Hunter) Battalion – Philippine Army sang mainterview sang Bombo Radyo Roxas.
Mahibaluan nga base sa impormasyon nga nakuha sang militar, 37 ka mga kandidato nga nagpapili sang nakaligad nga May 13 midterm elections ang nagasuporta sa rebelde nga grupo.
Sa nasambit nga numero, 15 sa mga ini ang nagdaog sa ila tagsa ka mga kandidatura.
Nahibaluan nga kalakip sa suporta nga ginahatag sang wala na ginhingadlan nga mga personalidad sa mga miyembro sang NPA amo ang kwarta, pagkaon, armas, kag iban pa nga kinahanglanon sang rebelde nga grupo.
Bangud diri posible suno kay Col. Batara nga pasakaan sang nagakaigo nga kaso ang nasambit nga mga opisyal bangud ang pagsuporta sa mga rebelde ang isa ka akto sang terorismo.
Samtang, ‘political survival’ ang rason sang kadamuan sa mga kandidato kun ngaman ginasuportahan sang mga ini ang mga rebelde.
