SAPIAN, CAPIZ- Ginalantaw sang alkalde sang banwa sang Sapian, Capiz ang isa sa mga problema nga ginpangatubang sang mga pumuluyo nga iya nasakupan sa tion sang pag-ulan sa diin amo ang pagluntad sang flashflood ukon pagbaha.
Sa interview sang Bombo Radyo kay Mayor Jose Villanueva sang Sapian, Capiz, iya ginpahayag nga ang amo nga sitwasyon ang pinaka-mayor nga rason sang iya nga mga proyekto nga ginadihon sa karon.
Nagapadayon na suno sa iya ang dredging, cleaning, widening kag pagpadalom sang mga suba para dalayon na nga madula ang mga pagbaha sa ila nga banwa.
Kadungan sang pag-ulan nga natabo sa probinsya sang Capiz sang tinalikdan nga adlaw, isa sa mga ginbaha ang ila nga banwa sa diin suno sa iya, personal nya ini nga ginlibot agud nga checkyaron ang sitwasyon sang mga pagbaha bangud suno sa iya, nabatyagan nya gid ang iya nga mga pumuluyo.
Dugang pa sang alkalde, ang amo nga sitwasyon ang ginasiguro gid nga mahatagan sang nagakaigo nga igtalupangod. Isa suno sa iya nga mga rason nga nagaluntad ang amo nga pagbaha, bangud nga malaka nalang ang mga kakahuyan, naganabaw ang mga suba kag ang presensya sang quarry sa ila nga banwa. Apang, ginsiling sini nga ang operasyon sang mga quarry companies ang ginpauntat na pamaagi sa pagpatuman sang Cease and Desist Order nga ginpapanaog sang Capiz Environment and Natural Resources Office (CAPENRO) kag ginapaidalom na sa karon sa mga imbestigasyon.
Panawagan naman sang alkalde sa mga pumuluyo nga iya nasakupan, nga kinahanglan gid ang kooperasyon sang tagsa-tagsa, likawan ang paghaboy sang basura sa suba agud nga malab-ot ang handom nga dalayon na nga madula ang mga pagbaha sa amo nga banwa.
In an interview with Bombo Jessa Mae De Los Santos
