ROXAS CITY – Madamo sang nagatuhaw nga mga pangalan sang posible magatal-os sa nabakante nga puwesto sang nagtaliwan nga CPP-NPA-NDF Founder Jose Maria “Joma” Sison.
Ini ang ginpahayag ni Mr. Jeffrey ‘Ka Eric’ Celis, self-confessed former rebel kag subong government whistleblower, sang mainterview sang Bombo Radyo.
Suno diri, komitiba ang nagapahulag sa CPP-NPA-NDF rason nga indi ini basta-basta madula, apang bangud sa kamatayon ni Sison dako ang epekto kag kadulaan sini sa mga rebelde nga grupo.
Ba-se sa iya nangin eksperyensiya sa nasambit nga grupo, may posibilidad nga ginapilian sa karon ang mga pangalan nanday:
*Rafael Baylosis – may kaso nga illegal possession of firearms and explosives apang nakapiyansa, gani nagapanago, tigulang na.
*Elizabeth Prinsipe – asawa sang ‘missing’ nga katapo sang National Military Commission nga si Leo Velasco. Si Prinsipe ang makabig man suno diri nga notorious leader bangud ini ang ginatudlo nagtiro sa kaupod man nila nga si Danny Cordero bangud sa pagsugid ni Cordero nga ini ang nagsugo nga palukpan ang Plaza Miranda rally sang Liberal party sang 1971.
* Tomas Dominado – taga Iloilo
*Concha Araneta
*Jessie Lepura – asawa ni Adora Faye Devera. Si Devera amu ang utod ni CHED Prospero Devera, nga nakapreso sa Calinog matapos madakpan kag naulamid sa pagpang-ambush sa mga scout ranger sang una.
*Luis Jalandoni – sa abroad
Dugang pa ni Celis, nga diri sa isla sang Panay, may mga yari man nga nabilin kaangay nanday Ted Cabales bata sini kag asawa; Cerila Estrada; Romulo Gangoso; Roberto Gomia; “Tonying”; “Mayok”; “Josephine Porquia, ka iban pa nga mga kadre apang maluya naman ang mga ini kag nagapalanago sa militar.
Ginhangkat man sini ang magasiling nga ‘red tagging’ ang iya ginahimo,nga magguwa sa publiko kun indi matuod.
Sa karon, nagapati si Celis nga nabudlayan ang CPP-NPA-NDF nga magpahamtang sang ila bag-o nga leader bangud indi sila makahiwat sang ‘Plenum’ ang pinakamataas nga pagsinapol sang mga rebelde nga grupo, bangud nga nagapalanago ang mga ini sa kaso nga ila ginapangatubang.
Tion naman suno diri sang gobyerno nga pangpapason na ang mga rebelde nga grupo, bangud ang ila presensiya ang ginalantaw nga rason sa wala pag-umwad sang Pilipinas.
