ROXAS CITY -Maid-id nga ginatun-an sang Provincial Inter-Agency Task on Covid-19 Disease ang pila ka mga restrictions kag mga protocols nga igapatuman sa natalana nga pagpaidalum sang probinsiya sa Modified General Community Quarantine (MGCQ) sa maabot nga bulan sang Hunyo.
Ini ang ginpahayag ni Mr. John Ace Azarcon, Provincial Director sang Department of Interior and Local government Provincial Office sang mainterview sang Bombo Radyo.
Ginpahayag ni Azarcon nga may pila ka mga restrictions sang General Community Quarantine (GCQ) ang natalana nga kakason sa tion nga ipatuman ang Modified General Community Quarantine.
Kalakip dri ang pagbawi sang curfew sa mga senior citizens kag pagbukas na sang pampubliko nga transportasyon sa bilog nga western visayas apang gin-athag ni Azarcon nga sa gihapon hugot nga igapatuman ang pila ka mga minimum health standards.
Gindugang pa ni Azarcon nga ginatun-an man sang task force nga kakason ang pila ka mga border control restrictions sa mga boundaries sang probinsiya.
Maga amat-amat naman balik sa normal ang operasyon sang halos tanan nga mga non-establishments apang sa gihapon magaobsebar sang hugot minimum health standards.
Pahanugutan man suno kay Azarcon ang pila ka mga social gatherings, ang pagkaon sa mga kalan-an mangin ang pagpatigayon sang misa apang limitado gid lamang nga mga tawo ang pasugtan nga magsulod sa nasambit nga establismento komersyal.
Samtang gin-athag ni Azarcon nga ang ginbasehan sang mga restrictions ang sandig sa ginpaguwa nga resolusyon sang National Inter-Agency Task Forc on covid-19 disease (NAITF) apang nakadepende sa gobernador kun sundun sini ang resolusyon sang NAITF.
