ROXAS CITY – Nagdagsa ang mga pasahero sa Roxas City Integrated Transport Terminal kasunod sa opisyal na nga pagsugod sang biyahe sang mga ceres bus nga may ruta Roxas City-Iloilo vice versa.
Mahibaluan nga alas 5 kaina sang aga sang nagsugod na sa pagbiyahe ang mga ceres bus kasunod sa pag-aprubar ni City Mayor Ronnie Dadivas sa letter of request nga ginpadala sang sang Vallacar Transit Incorporated.
Suno sa isa ka konduktor, gikan sa 33 ka seating capacity sang isa ka ceres bus, 17 lamang ang ila ginapasakay bangud sa ginapatuman nga physical/social distancing policy.
Mahibaluan nga una nga ginalista ang mga nagapila nga pasahero kun sa diin ginapafill-up sila sa form kun sa diin ginasulat ang ila pangalan, edad, address, contact number kag kun sa diin sila magapadulong.
Antes sila pasakaon sa ceres bus, gina-sprayhan ang mga ini sang alcohol/sanitizer sa kamot, ginapatapak sa foot bath, kag gina-tsekyar ang body temperature pinaagi sa thermal gun scanner.
Gindugang pa sang isa man ka konduktor nga temporaryo nila nga ginpaiway ang 20 percent discount sa mga senior citizen kag estudyante.
Apang mahimo sa gihapon masabak ang mga kabataan nga naga-edad 7 ka tuig panubo sa baylo nga magpamilya ini.
Mahibaluan nga may pagsaka man sa pletehan sang ceres bus kun sa diin para sa non-aircon units, P11 ang minimum nga plete sa una nga 5 kilometros kag dugang nga P1.85 para sa succeeding kilometers samtang sa air-conditioned units naman, P13 ang minimum nga plete sa una nga 5 kilometros kag P2.20 para sa succeeding kilometers.
Gilayon nga nagdalikyat padulong sa terminal ang isa ka mister agud makabiyahe pauli sa Iloilo matapos gintundaan siya nga nagbalik na sa pagbiyahe ang mga ceres bus liners.
Suno kay John, apisar madamo ang nagapila nga pasahero, naghulat gid sila para makasakay bangud madugay na sila nga nagakalangkag nga makapauli sa Iloilo agud mabisitahan ang ila mga kabataan.
Mahibaluan nga magapauli ini sa Batad, Iloilo kag naga-trabaho diri sa siyudad sang Roxas.
Suno naman kay Joy, residente sang siyudad sang Roxas kag naga-trabaho sa Iloilo City, dako ang iya pagpasalamat nga nagbalik na sa pag-biyahe ang mga ceres bus.
Ginpahayag sini nga humalin sang Lunes nga adlaw pa siya nagabalik-balik sa terminal kag nagatsekyar kun may nagabiyahe na nga bus.
