ROXAS CITY – Nagtaas sang 90% ang mga nagsulod nga pasahero sa mga pantalan sa probinsya sang Capiz kahapon, Oktubre 30, 2025.
Sa interview sang Bombo Radyo kay Senior Chief Petty Officer Arnel Nisola, Chief Master At Arms sang Philippine Coast Guard-Capiz, iya ginpahayag nga may yara sang 178 ka mga pasahero ang nagsulod sa probinsya sa diin mas mataas ini kun ipaanggid sa 94 ka mga pasahero nga narekord sang nagligad nga tuig.
Suno kay Nisola, sa mga pasahero naman nga nagguwa sa probinsya, may yara sang 154 sa diin mataas ini sa gihapon kun ipaanggid sa 107 nga narekord sang 2024.
Ginalauman sang natungdan nga mas magadamo kag magadugok pa gid ang mga pasahero sa mga pantalan karon sa hapon ukon sa gab-i agud nga mag-obserba sang tigkalalag sa Capiz.
Nagapasalamat man si Nisola sa kooperasyon sang publiko bangud nangin matawhay ang pag-abot kag paglakat sang mga pasahero.
