ROXAS CITY – Ginpasiguro sang Police Regional Office-6 Director nga mapatuman ang nangin mandu ni President Rodrigo Duterte nga pagpauntat sa tanan nga operasyon sang gaming schemes sa idalum sang Philippine Charity Sweepstakes Office (PCSO) sa sulod sang 24 oras.
Sa interview sang Bombo Radyo Roxas kay Brigadier General Rene Pamuspusan, ginpahayag sini nga ginsuguran na sang mga pulis ang paglibot sa tanan nga mga Lotto kag STL outlet sa Region 6 kag siguraduhon nga sarado ini kag wala naga-operate.
Suno pa sa opisyal nga wala sang pakasin-uhon ang PNP kag arestuhon ang sin-o man nga magalapas sa nasambit nga mandu sang presidente.
Nagpanawagan man si Pamuspusan sa mga manugtaya nga magkooperar kag indi magtaya bangud may mandu na ang presidente na nagapauntat sa tanan nga gaming schemes sa idalum sang PCSO.
Kalakip sa ginsuspende sang presidente ang operasyon sang lotto, stl, peryahan ng bayan kag keno bangud sa malapnagon nga korupsyon.
