ROXAS CITY, CAPIZ- Nagpalab-ot sang reklamo ang isa ka pumuluyo sang Barangay Cagay, Roxas City matapos nga ginsulod sang isa ka lalaki nga may deperensya sa paminsaron ang ila nga puluy-an.
Ang wala na ginhingadlan nga persona ang yara sa legal nga pang-edaron kag residente mismo sang amo nga barangay.
Sa interview sang Bombo Radyo kay Punong Barangay Arturo Aragon sang nasambit nga lugar, iya ginpahayag nga ang nasambit nga lalaki ang may yara na sang tatlo ka reklamo sa amo man nga ginabuhat.
Dugang pa sini, wala naman suno sa iya gapangawat ang amo nga persona apang ginkahangawa ini sang pila ka mga residente bangud sa iya sini nga pagpanulod-sulod sa mga puluy-an.
Samtang, ginapanawagan ni Punong Barangay Aragon sa mga pumuluyo nga magpabilin nga mangin aligmat kag alerto agud nga masiguro ang kaluwasan sang tagsa-tagsa kag kun mahimo, siraduhan mayad ang tagsa ka mga puluy-an antes nga magkatulog.
Interviewed by Bombo Sunnie Mae Batencila
