SIGMA, CAPIZ – Nagapabilin nga apektado sa karon ang mga residente sang Barangay Parian Sigma, Capiz bangud sa pagbaha sa tion nga magbubo ang mamunog nga pag-ulan sa ila lugar.
Ini matapos nagsugod ang quarry operation sa Barangay Parian, Sigma.
Naalarma ang mga residente bangud sang pagkakalbo sang bukid kun sa diin sa tagsa ka mag-ulan, naga-ilig ang tubig nga may dala nga lapok kag bato gikan sa quarry site kag nagabulhog ang tubig sa ila panimalay kag mga uyapad.
Magluwas diri, apektado man ang suba sa lugar kun sa diin sila nagakuha sang ginagamit nga tubig bangud sang kemikal gikan sa quarry site.
Mahibaluan nga naghalin na ang pila ka mga residente sa ila panimalay bangud man sa peligro nga matuga sini sa ila.
Suno sa isa ka residente nga si Ruby Capay nga sila pa ang ginabasol sang mga opisyales sa ila barangay bangud sa ginpalab-ot nila nga reklamo.
Ginpahayag pa sini nga wala sang maayo nga epekto ang ginapatigayon nga quarry operation sa lugar bangud apektado sa karon ang ila pananom kun sa diin, ini ang nagaserbe nila nga palangabuy-an.
Dismayado man ang mag residente matapos nga nagpalab-ot sila sang reklamo sa ila mga barangay officials apang wala sa gihapon ginhatagan sang aksyon.
Nagalaum man ang mga residente nga gilayon ini maaksyunan kag matigayon nga mapauntat ang illegal quarry operation sa nasambit nga lugar.
Matandaan nga nakalab-ot na sa talapatan ni Governor Esteban Evan “Nonoy” Contreras ang nasambit nga problema rason nga ginhatagan sila sang kopya sang gobernador sang gin-issue nga cease and desist order pinaagi sa Capiz Provincial Environment and Natural Resources Office (CAPENRO).
