ROXAS CITY – Temporaryo nga gindumilian ang mga residente sang pila ka mga sitio sa tatlo ka mga kabaranggayan sa Roxas City nga magpadulong sa talatapan sang Metro Roxas Water District (MRWD) agud magbayad sang ila nga water bill.
Ini ang ginpahayag sang tagpamaba sang amo nga talatapan nga si Mr. Mark Vincent Bernas sang mainterview sang Bombo Radyo.
Suno kay Bernas nga ang tatlo ka mga ginatumod nga barangay ang ginalakipan sang Barangay Culasi, Punta Tabuc kag Cagay.
Kasunod ini sang pagkapagkit sang kaso sang coronavirus disease (COVID-19) sa amo nga mga barangay nga ginapatihan lunsay local-transmission.
Suno kay Bernas nga kalakip ang Sitio Sacop sa Barangay Culasi nga pagadumilian anay nga residente nga magbayad sa talatapan.
Samtang ang mga sitio sang Hermano, Cassandra kag Paghidaet naman sa Barangay Punta Tabuc kag mga sitio sang Kagitingan kag San Lorenzo naman sa Barangay Cagay.
Ginklaro man sini nga wala sang penalidad nga pagabayaran ang mga konsumidor sa tanan nga sitio sang amo nga barangay kun indi sila makabayad sang ila water bill kag indi man sila pag-utdan sang linya sang tubig.
Nahangpan suno diri sang talatapan nga ang mga pumuluyo sa amo nga barangay ang nagalikaw pa sa karon nga maguwa bangud sang peligro nga malatnan sang virus.
