ROXAS CITY – Masobra 200 ka mga suporters ni Former President Rodrigo Roa Duterte ang nagpatigayon sang Prayer Rally sa syudad sang Roxas para mahilway ang anay Pangulo.
Sa interview sang Bombo Radyo kay Mr. Anthony Yngcong, isa sa mga nagasuporta kay Former Pres. Duterte, ginpahayag sini nga indi patas ang pagdakop kag pagdala sa Netherlands kay Duterte nga kasubong ginkidnap ini kag wala madala sa korte sang Pilipinas.
Dugang pa sini nga kun may ara gid man sang sala ang anay lider diri dapat sa Pilipinas ini ginalitis bangud naga-function ang hustisya sa pungsod.
Nagapati man sila nga kapareho nga gintraidor si FPRRD sang kapareho niya nga pilipino tungod una sa tanan indi na miyembro sang International Criminal Court ang pungsod gani wala na sila sang kinamatarong.
Samtang posible nga magdamo pa ang magaupod sa ila nga nagasuporta kay Former Pres. Duterte sa ila pagahiwaton liwat nga pagtipon sa Marso 28.
