ROXAS CITY – Kadungan sang National Cancer Awareness Month, ginpatpat sang katapo sang Capiz Provincial Health Office ang pila ka mga senyales kag kun paano malikawan ang balatian nga breast cancer.
Sa interview sang Bombo Radyo kay Jeiel Mark Ledesma Nurse II kag NCD Coordinator sang Provincial Health Office, ginpahayag sini nga importante nga tsekyaron sang isa ka persona ilabi na sang mga kababainhan ang ila lawas.
Ini bangud pila sa mga senyales sang balatian nga breast cancer amu ang pagmanas sang suso, indi palareho ang kadakuon, may pagbag-o ang kadakuon sang nipple, may nagaguwa nga nana, may bukol sa idalum sang parte sang ilok, kag pag-angkon sang rashes sa parte sang suso.
Nagakadapat man nga magpakonsulta sa isa ka espesyalista agud mapaidalom sa mammogram kun mabatyagan na ang kaangay nga sintomas.
Mahimo man nga malikawan ang amu nga balatian pinaagi sa paglikaw sa pagkaon sang madamo sang preservatives, mga fatty foods, pagpanigartilyo kag pag-inom sang makahulubog nga ilimnon, sa baylo, magkaon sang mga masustansiya nga pagkaon nga makahatag sang bitamina sa lawas.
Ang cancer ang isa ka sahi sang non-communicable disease, buot silingon nga indi ini makalalaton bangud makuha ini pinaagi sa genes ukon poor lifestyle.
Nahibaluan nga may yara sang 2 ka napatay sa nasambit nga balatian sa probinsya sang tuig 2020 kag wala man sang nabalhag sang nagligad nga tuig.
Mahimo man nga magpadulong sa mga health centers agud magpamangkot sang dugang nga impormasyon sa mga doktor ukon nurses.
