Nagalaom ang mga tricycle driver sa banwa sang President Roxas, Capiz sang mahapos nga guidelines sa paghatag sang fuel subsidy sang Department of Social Welfare and Development (DSWD).
Ini bangud man sang ginapahayag nga indi tanan nga naga pasada ang nakabaton sang subsidy bisan pa may lisensya kag naga trabaho bilang tricycle driver.
Sa interview sang Bombo Radyo kay Mayor Escolin, iya ginpahayag nga mabudlay para sa mga driver ang ginbasehan nga guidelines sang nasambit nga ahensya.
Suno pa alkade, ginapangabay nila nga tani ma-cater ang kahimtangan sang mga tricycle drivers sa banwa kag mahatagan sang “human consideration.”
Dugang pa niya, daku gid nga bulig para sa mga driver ang paghatag sang P5,000 nga ayuda sa ila pang adlaw-adlaw nga galastuhan ilabi nga naga-atubang sang krisis ang pungsod.
