Sapian, Capiz— Ginrekomenda sang Mines and Geosciences Bureau (MGB) region 6 ang pag relocate sa mga residente sang sitio Ilaya, Barangay Poblacion, Sapian agud malikaw ang mga ini sa peligro nga dala sang ginalauman nga pagligid sang dalagko nga mga bato nagikan sa ibabaw sang bukid sa nasambit nga lugar.
Suno sa Geologist 2 sang MGB region 6 nga si Myron De Guzman dako ang posibilidad nga mahulog sa tiilan sang bukid nga nahamtangan sang mga pamalay ang dalagko nga mga bato nga yara sa ibabaw kasunod sang ginpatigayon nga assessment sini sa lugar.
Gindugang pa ni De Guzman nga sandig sa ila nga assessment kaupod ang mga opisyal sang Environmental Management Bureau, Provincial Environment and Natural Resources kag Provincial Disaster Risk Reduction and Management Office nga ang masami nga pagbubo sang mamunog nga ulan ang gintunaan sang paghumok sang lapok nga naga uyat sa mga bato ang rasun kun ngaa amat-amat ang mga ini nga nagakahulog gikan sa ibabaw sang bukid.
Bangud sa sini nga peligro ginapanugyan sang MGB nga i-relocate ang mga residente sa hilway nga lugar.
Sa karun nagapabilin sa evacuation center ang pila ka mga residente apang ang iban ang nagapakatig-a kag nagabalik sa ila mga poluyan.
Natalana naman nga magpatigayon sang sinapol ang mga miyembro sang Municipal Disaster Risk Reduction and Management Council sa pagpanguna ni Mayor Arthur John Biñas kag MDRRM officer Kenneth Honrado agud hinalaan ang nangin resulta sang assessment sang MGB kag iban pa nga ahensya sang gobyerno.
