ROXAS CITY – Hugot nga ginpanginwala sang militar ang alegasyon sang rebelde nga News Peoples Army nga apat ka mga soldalo ang ginaalegar napatay sa ginpatigayon nga ambush batuk sa laban sa tropa sang gobyerno sa Barangay Lahug, Tapaz, Capiz.
Sa interview sang Bombo Radyo Roxas, ginpahayag ni Lt. Col. Sisenando Magbalot Jr., battalion commander sang 61st Infantry Battalion, Philippine Army nga yara sa “state of hallucination” lamang ang tagpamaba sang Igabon Platoon sang Jose Percival Estocada Jr., Command nga si Roja Panay nga amo ang nagpaguwa sang report.
Nahibaluan nga ginpahayag sa Bombo Radyo Roxas ni Roja Panay nga apat ka mga soldadoo ang napatay sang malukpan sang ila gintanum nga duha ka command detonated improvised explosive device ukon IED samtang nagapatigayon sang combat patrol ang tropa sang gobyerno sang Domingo sang gab-i.
Apang ginpanindugan ni Magbalot nga wala sang kamatuoran nga may nahinabo nga ambush ukon engkwentro sa tunga sang rebelde kag militar nga ginkamatay sang pila ka mga soldado.
Nagapati si Magbalot nga ginpaguwa lamang sang mga rebelde ang nasambit nga sala nga report sang ila nga mga tinawo nga sa karon tuman ka nubo ang moral bangud sa engkwentro nga natabo sa probinsiya sang Antique sa diin pito ka mga NPA ang napatay.
Gindugang pa ni Magbalot nga indi nila mahimo nga taguon sa publiko kun matood nga may nahinabo nga engkwentrp kag may mga napatay sa bahin sang militar.
