Nagapati ang tropa sang militar nga may dako nga epekto sa rebelde nga grupo nga New People’s Army ang kamatayon sang lima nila ka miyembro sa nagluntad nga engkwentro sang damlag lang sa Brgy. Aglonok, Calinog, Iloilo.
Sa pagpakig-angut sang Bombo Radyo kay LT. COL. Jay Javines, tagpamaba sang 3rd Infantry Division, ginpahayag sini nga maganubo ang moral sang rebelde nga grupo kag mabudlayan na ang mga ini magganyat sa mga pumuluyo bangud lakip sa mga napatay sa engkwentro ang matag-as nga lider sang NPA.
Samtang ginkumpirmar man ni Javines nga taga-Capiz ang isa sa lima nga napatay sa engkwentro nga si Rumulo Ituriaga Gangoso nga may mga alyas nga si Reagan, Pedik, kag Randy nga residente sang Sitio Tuwang-tuwangan, Barangay Bungsuan, banwa sang Dumarao.
Nahibaluan nga si Ka Reagan ang anay commanding officer sang Eastern Front, Kilusang Rehiyong Panay kag sang Regional Headquarters, KR-Panay.
Wanted man ini sa kaso nga alarm and scandal sa banwa sang Maayon.
Magluwas kay Commander Reagan lakip sa mga napatay amo sanday Aurelio Berjes Bosque, alyas Burnok/Bayjan/Sarco/Boy, 57-anyos, residente sang Brgy. Carvasana, Calinog, Iloilo; Jovelyn Silverio, alyas Darlyn/Kaykay/Akay/Porang, 40-anyos, residente sang Brgy. Patria, Pandan, Antique; Armando Rogelio Sabares, alyas Kamlon/Nene/Kulot/Nono, residente sang Brgy. Igcaratong, San Joaquin, Iloilo; kag Jielmor Gauranoc, alyas Doc/Tango/Baron, 37-anyos, residente sang Brgy. Aras-asan, Sebaste, Antique.
Sa engkwentro nga natabo sa Calinog, Iloilo, narekober sang mga militar sa 12th Infantry Battalion ang duha ka M16 Rifles kag isa ka M203 Grenade Launcher, isa ka Anti-Personnel Mine, mga bala, gadgets kag iban pa nga mga dokumento.
Ginalauman naman suno kay Javines nga may mga masunod pa nga encounters bangud madamo pa sang nabilin nga rebeldeng NPA sa nasambit nga lugar.
Photo credits: Philippine Army Spearhead Troopers
