ROXAS CITY-Temporaryo nga ginsuspinde sang Archdiocese of Capiz ang pagpatigayon sang mga misa sa mga simbahan sa siyudad.
Ini ang ginkompirmar ni Rev. Fr. Emilio Arturo Arbatin, Spokesperson for Social Communication and Mass Media.
Ginpahayag ni Arbatin nga sandig sa ginpaguwa nga Circular No. 22 series of 2020 ni Msgr. Jose Advincula nga temporaryo nga suspindihon ang pagpatigayon sang misa sa mga simbahan sa siyudad sumugod Agosto 18 tubtob Agosto 31.
Kasunod sang pag-anunsyo ni City Mayor Ronnie Dadivas matapos nga narekord sang local transmission sa siyudad.
Gin-athag ni Arbatin nga indi sakop sang circular ang mga simbahan sa mga kabanwahanan.
Mahimo sa gihapon nga magpakig-upod sa misa ang mga tumuluo pinaagi sa facebook live sang simbahan.
Samtang, ginklaro ni Arbatin nga ang pagpatigayon sang bunyag, kasal kag misa sa mga patay ang temporaryo man nga suspendido magluwas sa mga nakalista na antes pa nagpaguwa sang circular.
Kadungan sini, ginpahanumdum ni Arbatin ang magapatigayon sang bunyag, kasal kag misa para sa patay nga mag-obserbar sang mga health protocols kalakip na ang pagsuksuk sang faceshield kag facemask, pag-obserbar sang social distancing kag pagdisinfect antes magsulod sa simabahan.
