ROXAS CITY – Ginpanginwala sang isa ka ginang ang alegasyon nga nakatulog ini kaupod ang iya mga kabataan sa barangay quarantine facility sang Barangay Bolo, Roxas City kun sa diin naka-quarantine ang iya bana nga isa ka Locally-Stranded Individual (LSI).
Suno sa 36 anyos nga ginang, nagbisita lamang sila bangud tatlo na ka tuig wala nakita sang iya mga kabataan ang ila amay apang wala sila diri naka-close contact kag nagkatulog.
Ginpahayag sini nga nagdul-ong na lamang sila sang pagkaon sa iya bana sa amo nga pasilidad.
Ginklaro man sang ginang indi sa Marawi City naghalin ang iya bana kabaliskaran sa pahayag ni Punong Barangay Sioly Andrade bangud sa Zamboanga City ini naghalin.
Ginpahayag pa sini nga sa Iloilo una nag-abot ang iya bana kag nag-commute lamang pauli sa Roxas City.
Suno pa sa ginang nga sila pa ang nagmatu-mato sang kadto sa Hortus Botanicus sa Barangay Milibili, Roxas City agud makapaidalom sa rapid test ang iya nga bana kag nag-diretso sa quarantine facility sang Barangay Bolo.
