Patay ang 32 anyos nga public school teacher kag anay national beauty pageant finalist nga si Lullete Jane Ramilo-De Guzman, matapos ginluthang samtang yara sa sulod sang iya salakyan sa atubang sang iya balay sa San Manuel, Isabela.
Suno sa imbestigasyon, nagapungko ini sa sulod sang sport utility vehicle kaupod ang iya tatlo ka kabataan sa Barangay Cabaritan sang ini ang ginluthang sang wala makilala nga suspetsado nga nagasakay sa motorsiklo nga wala sang plate number.
Gilayon man nga nagpalagyo ang mga suspetsado padulong sa National Highway, sang Brgy. Distrito 3, San Manuel, Isabela.
Gindala pa ang biktima sa Manuel Roxas District Hospital, apang gindeklarar ini nga dead on arrival sang doktor.
Matandaan nga nangin runner-up si Ramilo-De Guzman sa 2013 Miss Philippines-Earth kag nakabaton sang pila ka special awards antes nagpadayon sa iya career bilang manunudlo matapos magtapos sa University of Perpetual Help System-Isabela campus.
Sa subong, nagapadayon pa ang imbestigasyon kag ginalantaw ang nagkalain-lain nga anggulo lakip na ang personal kag propesyonal nga motibo sang mga suspek.
