ROXAS CITY – Patay ang isa ka 57-anyos nga mister matapos nga ginluthang sang iya kahampang sa sugal sa Sitio Ilaya, Barangay Dinginan, Roxas City.
Ginkilala ang biktima kay Gallardo Antinquinia sang nasambit nga lugar.
Base sa inisyal nga imbestigasyon sang Roxas City PNP nga nagahampang sang sugal sa bilasyunan ang biktima kag suspek nga si Charlie Dela Cruz alyas Panot, 35-anyos sang hinali na lamang nga nag-angkon sang komosyon ang duha ka nasambit nga persona.
Bangud diri, ginpapauli na lamang ang duha sa ila tagsa ka mga panimalay.
Wala naman ginalaoman nga nagbalik ang suspek kag may dala na nga improvised shotgun nga may magazine kag gilayon nga nagpadulong sa balay sang biktima kag ginhangkat ini sang inaway.
Apang, sang nagapalapit pa lamang ang biktima hinali na lamang ini ginluthang patay sang suspek.
Nag-angkon naman sang pilas sa natuo nga porsyon sang dughan ang biktima nga gintunaan sang iya kamatayon.
Gindala pa ang biktima sa ospital apang gindeklarar naman ini nga dead on arrival sang attending physician.
Samtang, gilayon naman nga nadakpan sang mga kapulisan ang suspek matapos ang insidente.
