Imbes nga matam-is ang selebrasyon sang Valentine’s Day, nagresulta sa eskandalo kag nagdangat sa prisohan ang sikreto nga pagkitaay sang isa ka misis kag iya karelasyon matapos nga madakpan sila mismo sa akto sang iya mister.
Suno sa report gikan sa Police Station 2, ginkilala ang 22-anyos nga misis nga si alyas “Lyn” nga residente sang Cotabato City kag ginkilala naman ang iya 18-anyos nga kabit nga si alyas “Jun” nga residente naman sang South Upi kun sa diin nagkitaay ang mga ini sa isa ka kilala nga inn sa nasambit nga syudad para sa ila bawal nga relasyon.
Apang ang ila matam-is nga pagkitaay nagresulta sa bangungot sang hinali nga nag-abot ang mister ni Lyn.
Suno diri nga natingala ang mister kun ngaa wala pa nagapauli ang misis, gani nagdesisyon ini nga sundan ang iya asawa.
Didto kag naabtan mismo sang mister ang iya misis kag ang solterito nga karelasyon sini sa sulod sang lodging house nga pareho nga wala na sang panapton.
Sa tuman nga kaakig, gilayon niya nga gin-ayad ka kastigo ang lalaki nga kaupod sang iya asawa antes dal-on ang duha sa police station.
Natukiban sang bana nga kaupod man sang iya misis ang ila nga anak sa inn, nga ginpatulog anay sa pihak nga kwarto antes ginhimo ang bawal nga paghigugmaanay sang duha.
Sa karon, ang dapat kuntani nga mainit nga Valentine’s date, nagresulta sa pagkapriso.
Kaso nga adultery ang igapasaka sang mister batuk sa duha.
